خبريات تحت الضوء

كلنا بدنا حشيشة

* كتب الناشط السياسي رياض الأسعد على صفحته على "فيسبوك": البلد كلو عقد. عقدة درزية بتنحل، وبتشرّف محلها عقدة أرمنية.

عقدة قواتية عصيّة على الحلّ.

عقد مسيحية رئاسية من الشمال إلى الجنوب.

عقد تاريخية.

عقد شخصية.

نواب ووزراء ومستوزرين معقّدين ومش حالّين. وكل واحد منهم بدّو 100 دكتور عقد نفسية لنفهم عليه.

لذلك لو تمّ إصدار قانون خاص يفرض تدخين سيجارة حشيش يومياً عند الصباح على هالمعقّدين، كانت تألّفت الحكومة من زمان".

– بدّك للصراحة، كلنا صار بدنا سيجارة حشيش يومياً، لعلّ وعسى إذا نفّخنا على أزماتنا بتنجلي.

شعب مثقّف!

* للدلالة على انعدام ثقافة الشعب اللبناني، كتب ناشط على وسائل التواصل الاجتماعي: "نحنا الشعب الوحيد يللي بيمسح الشبابيك بالجرايد وبيقرأ الأخبار بالفنجان".

– أساساً صار بدنا منجّم ابن كار ليخبرنا شو عم بيصير بالبلد.

قاطع "النعمة" يا نعمة

* صرّح النائب نعمة طعمة مؤخراً أنّ باستطاعته بناء محطة كهرباء تغطي حاجة لبنان بلا مقابل.

– عن جدّ إنو إنت مش اسم على مسمّى. ليه بدّك تقطع "نعمة" البواخر التركية عن المسؤولين يا نعمة؟!

الحصان يمكن "يجحّش"

* في معرض اعتراضها على ما آلت إليه أحوال الدول العربية، كتبت ناشطة على صفحتها على "الفايسبوك": "لم يبق من العروبة سوى الحصان العربي الأصيل"، ومن ثمّ أردفت: "والله يستر ما يجحّش كمان".

– ولك خليه يجحّش أحلى ما يحس عا حالو غريب بيناتنا.

لمّو بزّاق وطعمو الدجاجات

* كتبت ناشطة على مواقع التواصل الاجتماعي: "تأسف شركة كهرباء لبنان للأعطال التي أصابت شبكتها إثر بخّة المطر التي هطلت فجأة، ووعدت المواطنين بإصلاح الأعطال فور عودة الموظفين من لمّ البزاق".

– بقدّر إنو بس رجعو من لمّ البزاق، راحوا يطعمو الدجاجات اللي حاطينن بالطابق السفلي من مبنى كهرباء لبنان بمار مخايل، ل هيك تأخّرت الكهربا حتى إجت.

الليرة بالأرض يا شباب

* أجرى أحد الناشطين على "الفايسبوك" دراسة مقارنة لوضع الليرة اللبنانية بدأها من العام 1850، وكتب في هذا الإطار: "سنة 1850 لو معك 1000 ليرة بتشتري نص لبنان.

سنة 1890 لو معك 1000 ليرة بتكون ملك زمانك.

سنة 1910 لو معك 1000 ليرة كان فيك تشتري قصر وتعمل مشروع كبير وتعيش وتتنغنغ بحياتك.

سنة 1940 لو معك 1000 ليرة بتشتري بناية 4 طوابق وبتزوّج ولادك، والباقي بتشتري فيه كم هكتار مزروعين ليمون.

سنة 1970 لو معك 1000 ليرة بتشتري بيت وبتتزوّج.

سنة 2000 لو معك 1000 ليرة بتكفيك حق ترويقة.

وسنة 2018 لو معك 1000 ليرة فيك تقعد بالبيت وتشتري كرامتك لأنو حتى ربطة خبز ما بتجبلك.

– لو معك مليار دولار، ما في شي بيشتريلك كرامتك بهالبلد.

تضحية شمعة!

* كتب حزبي سابق على صفحته على "فايسبوك": "أشعر بخيبة شمعة ضحّت بنفسها لتضيء غرفة أعمى".

– دخلك ما تأخّرت شوي على هالحكي؟!

ذكرى 13 تشرين للمتلونين

* كتب أحد السياسيين المتلونين على صفحته "الفايسبوكية": "13 تشرين 1990 – 13 تشرين 2018. ثبات وعزم وإرادة ورؤيا". ووضع صورة للرئيس ميشال عون، وكتب فوقها: "لبنان بخير بقيادتك وحكمتك".

– عزيزي أيها السياسي الفهيم. رؤية مع تاء مربوطة وليس مع ألف. وعا قبال ما تجيك شي رؤيا ويصير عندك رؤية.

مستشار فني لاتحاد بلديات جزين؟

* في خطوة غير مسبوقة، عيّن رئيس اتحاد بلديات جزين خليل حرفوش رساماً برتبة مستشار فني لاتحاد بلديات جزين.

– شو بدّك ترسملنا ريّس خليل؟ ما بتكفّي رسمة كفرفالوس؟!

"واي فاي" من قبرص!

* كتب أحد الناشطين في الفضاء الافتراضي: "قد ما الانترنت بطيء بلبنان، بحسّ إنّو لبنان سارق واي فاي من قبرص".

– والله معك حق. أنا أساساً ما بلقط واي فاي بالبيت إلاّ ما أوقف عالواجهة يللي بتطل على قبرص.

(شارك هذا المقال)

اترك تعليقاً

لن يتم نشر عنوان بريدك الإلكتروني.