خبريات تحت الضوء

وزارة الزراعة لباسيل؟

* كتب ناشط سياسي على صفحته على "فايسبوك": "لو الدولة جدية بتشريع الحشيشة، كان صرلنا شهرين عم نسمع جبران عم يطالب بوزارة الزراعة".

– جبران بيعرف إنّو كل مهنة إلها أربابا، كرمال هيك ما طالب بوزارة الزراعة.

 

سدوم وعمورة

* وضع حزبي سابق صورة للبنان المشلّع، وعلّق تحتها: "الحل: سدوم وعمورة".

– حبيبي مفاسد سدوم وعمورة هيي إصلاح بلبنان. بدنا شي بعد أتقل.

 

طلبات "المدامات"

* نشر ناشط صورة لدركي يساعد سيدة مسنة تجلس على كرسي متحرك على الانتقال، وكتب تحت الصورة: "ألف تحية لك، وألف شكر لأنّك عم تساعد إنسان ومش حامل جزدان المدام".

– على سيرة جزدان المدام، أيمتى بدو ينفك أسر الأمن من طلبات "المدامات".

 

قرود الإرهاب

* انزعج ناشط عوني من تعليقات الفضاء الافتراضي على هفوة رئيس الجمهورية العماد ميشال عون بإطلاقه تسمية فوج القرود بدل فوج الجرود على خريجي المدرسة الحربية، فكتب: "القروض أنهكت لبنان، والقرود تعيق تشكيل الحكومة، أمّا الجرود فهي مقبرة للإرهابيين وللقرود الذي يدعمونهم".

– فهمنا إنو عالأرض ممنوع الحكي، ولاحقينا عالفضا؟

 

شعب غاشي

* وضع ناشط بيئي فيديو على صفحته الخاصة على فايسبوك لبحر لبنان، وظهرت في الفيديو بقح داكنة على وجه الماء، وعلّق فوق الفيديو: "يا شعب لبنان الغاشي".

– يا أخي عقولنا صارت ملوثة. هيي واقفة عالبحر؟!

 

مكافح للفساد على خطّ واحد

* كتب ناشط في مكافحة الفساد على صفحته على فايسبوك: "بخصوص موضوع البواخر، يصرّ وزير المالية على المكابرة وتحوير الحقائق الحسابية، إمّا عن جهل، وإمّا عن عدم كفاءة، وإمّا عن حقد".

– يا حبيبي هيدا فاسد وحاقد وجاهل وغير كفؤ، بس هيداك كمان فاسد وحاقد وجاهل وغير كفؤ. الله يخليك اشتغل عالخطين مش عا خط واحد.

 

عا حفّة البلد

* تحت عنوان "غالطوني"، تنشر الإعلامية ليال أبو موسى سلسلة تتمحور حول فساد السياسيين في لبنان، وفي إحدى "حلقاتها" قالت أبو موسى: "بهيدا البلد، ما عندن مشكلة يوقفوا قروض الإسكان لأنن ساكنين بمصرياتك بنص البلد".

– ليش الظلم يا ليال. نجيب ميقاتي ساكن عا حفّة البلد!

(شارك هذا المقال)

اترك تعليقاً

لن يتم نشر عنوان بريدك الإلكتروني.